De Kommers weer an 26. Januar 2003 in dat Mehrzweckhuus. De 1. Baas Günter Diekhoff begrödt de Lüüd:

Miene Domen un Herren, leeve Lüüd,
in Nomen von "De Lüüd von Ossentorm" gröt ick jo von Harten. Wi freut uns, dat ji den
25. Geburtsdag mit us fiern wüllt.

Besünners begrödt ick den Bürgermeister von de Stadt Langen Jürgen Kopelke un sien Fro, den Ortsrot Imsum mit use stellvertretene Bürgemeisterin Ursel Themann-Weber, us nee Pastorin Fro Rös-Breden un uk den Bürgermeister von Land Wursten Wolfgang Neumann.

25 Johr "De Lüüd von Ossentorm":

Wie hett dat all'ns anfungen?

"De Idee harr use Bürgermeister Fritz Thode. In'n Winter 1976/1977 vertell he dat un wi hebbt dorüber snackt. Denn wöörn noch mehr Lüüd ansnackt, ober de harrn noch nich so recht Mood dorto. De een snackt sick hier-mit rut un de anner dormit. Ordentlich Damp keem dor erst achter, as dat weller no'n Harvst gung. Dor seeten sick Bürgermeister Thode un Fro Marianne Ellßel tohop un hebbt dree lüttje Sketche instodeert. Bit Inöben hebbt de beiden veel Spoß hart un sick düchtig een höögt. Speelt hefft se de dree Stücke an den 13. Oktober 1977 in dat Gemeendehuus op een "Gemütlichen Nomiddag" von de Arbeiterwohlfahrt. Junge di, wat hebbt de Lüüd lacht un klatscht. Dat harr jo ok all'ns fein klappt. Nu op mol harr'n dor noch mehr Lüüd Lust to kreegen. Nu schullt to de Wiehnachtsfier för öllere Lüüd uk wat instodeert warrn. Erstmol müssen dor nu jo Bööker her. Wi kreegen de Bööker von den Theoterverlag Mahnken ut Verden. Nu keem dor ober Schwung achter den ganzen Krom! Dat Inöben gung los un to de Wiehnachtsfier warn dree lüttje Stücke speelt. Dat erste Stück hebbt Hertha Völkel, Wilhelm Görtz und Dieter Osterndorff, dat tweete Marianne Ellßel un Heinz Knippenberg, dat dritte Edith Kluge u. Annette Faße speelt. De Speelers geben sick düchtig Möh un dat hett ok all'ns good klappt undde öllern Lüüd hett dat bannig good gefullen.

Jo, süh, so sünd wi dor sinnig un lütt mit anfungen.

Denn keem de Gründungsversammlung:

De Lüüd, de denn Vereen bitreen wullen, harrn sick an 26. Januar 1978 in de Wirtschaft "Wurster Landhaus" in Imum dropen. Bekannt worn wör de Krom dör de Zeitung, dör grote Plokote un dordör, datt sick dat in't Dörp rumsnackt harr. Tohopkomen werrn 27 Lüüd. Torerst hett de Bürgermeister Fritz Thode jem all "Gooden Obend" seggt un denn hett he vertellt, wie he sick dat so utdach harr un wie dat all ne teemliche Tied in sein Kopp rumgeiht un wie good dat wöör, wenn in't Dörp mehr plattdtüsch snackt wöör un sogor Theoter op plattdütsch speel wöör. Poor Mannslüüd un Froonslüüd harrn jo all annerleds to Wiehnachten poor lüttje Döntjes speelt un de Lüüd, de dorbi tokeeken harrn, harr dat bannig good gefullen. He meen, de, de dor Lust to harrn, schulln dat man wiedermoken. Jo, un so is dat denn in ne Gang komen.

He harr sick son goode 100 Stück von de Regeln drucken loten, op teemlich dicket geelet Papeer. Dor stunn op plattdütsch to lesen, wonehm sick de Lüüd to verholen harrn, wenn se dor tohörn wullen. He lees jem dat vör un verkloor jem ok wat. De Lüüd hörn em all good to, un poor wullen noch dit un dat weeten. Hee puul jem dat utenanner. Heinz Ellerbrake, de beten loter komen wör, har noch wat an 'n Bort to brummeln. Ober ton Quarken keem he gornich so recht. De annern stuken em torech un von dor an gung dat mit em un he wöör den ganzen Obend de beste Kerl, denn 'n denken kann. Is he annere Tied jo uk.

To dissen Obend wöör uk een Zeitungsschrieber dorbi, de seet an'n Disch för sick alleen un lüster to. He harr all poor Bleesticken afbroken, ober he hol jümmer mehr ut sien Tasch un schreef dor as wild op dol. Johannes Ohm heet he un wör 'n groten stotschen Kirl. He wohnt in de Bohnhofstroot. He weer fröher Gendarm ween, teemlich scharpen sogor, ober gerecht gegen jedereen. Dat kunnen nich anners seggen. Nu wöör he jo pensioneert un verleev sien Geld as Rentier.

Nu wöör erstmol afmokt, dat jedereen plattdütsch snacken mutt un een to den annern Du seggen schall. Nu gung dat jo los mit dat Wählen. Toerst muss dor je mol 'n Vorstand her. Verschlogen wörrn för jeden Posten meist twee un dree Mann. Toerst wöör de 1. Baas wählt un jümmer so wieder.

De erste Boos is Fro Marianne Ellßel worrn, de hier in de Bohnhofstroot wohnt un teemlich stäbiget un stotschet Fronsminsch is.
De tweete Boos heet Wilhelm Görtz. He ist nich to groot wussen, ober sien Muulwark weet he good to bruken.
As Geldindriber keem Heinz Knippenberg an ne Reech.
To'n Schrieber hefft si mi (Fritz Thode) sülben mokt. Dor will ick man leever nix öber schrieben, kann mi jo nich sülben slecht moken.
Twee Revisors wörn nu an de Reech. De mööt good op dat Geld oppassen.
Hans-Dieter von Glahn un Edith Kluge heet de beiden. He is en ganz ruhigen, ober 'n stäbigen Kirl, hett all rein so'n beeten wat von 'n Buuck, dat kummt von all dat Beer supen. Unse Edith is beten finer un nich to groot för een Frominsch. Sünst ober stotsch antosehen un uk teemlich gau mit ehr Muulwark. Se kann Döntjes vertelln, de nich jümmer ganz "stubenrein" sünd.

Nu gung dat um den Bidrag. Toerst wull nüms so recht wat seggen. Ober den wöörn se doch alltohop inverstohn mit 50 Obnohmgroschen un 20 Groschen in Maand Bidrag to betohlen.

So, dat wöör nu jo wohl de Hauptsook, de ick opbschrieben schull. So gau gung de ganze Krom gor nich. Dat gung all'ns fein no de Reeg un ganz in Roh to.

Froonslüüd un Mannslüüd vertelln sick noch düchtig wat, wobi de Froonslüüd am besten schnotern kunnen. Se vertelln Döntjes, de nich jümmer "stubenrein" wöörn, ober gern hört worrn un öber de düchtig lach wöör. De Mannslüüd harrn dat bös drog mit den Köm un dat Beer.

Sü - un so gung de Obend fein sinnig un gemütlich to Enn un jeder gung tofreden no Huus."

De erste Optritt weer an 20., 21., 27., 28.04. und 05.05.1978 in de Weddewardener Schule:

"De hooge Besöök"
Speellüüd:Heinz Knippenberg, Marianne Ellßel, Dieter von Glahn, Tosnacker: Frau Noack

"Is Korl een Knickerbüddel"
Dieter Osterndorff, Edith Kluge, Wilhelm Görtz, Marianne Weigelt, Werner Schwarz,Tosnacker: Hertha Völkel

Alle fief Obende weer de Aula in de School mit 80 Lüüd jümmers vull. De Lüüd hebbt düchtig klatscht un dat hett jem veel Spoß mokt.

2,50 DM hebbt wi för use Korten nohmen.

De Speelers hefft alltohop ganz wunnerbor speelt un hefft sick veel Möh geben. Jedereen kunn sein Rull butenkopps un dat hett all'ns bestens klappt. As "Belohnung" hebbt de Froonslüüd achterher jümmer ne lüttje Bloom kreegen. De Mannslüüd kreegen 'n lütten Köm.

Un dat hebbt wi in dat Gründungsjohr noch op de Been stellt:

20., 22., 26.10.1978 Gemeindebüro bei der Kirche	Deichlerchen (Anna Stöwing, Luise Dieckhoff, Olga Krug, Hilde Balk, Fredy Balk, Heinz Ellerbrake, Ewald Dieckhoff, Günter Diekhoff, Elfriede Themann, Wolfgang Weigelt)
	"Bi'n Doktor"	Dieter Osterndorff, Annette Faße, Fritz Thode
	"Dat Wunnerwark"	Frauke Osterndorff, Anita Reinke, Hertha Völkel
	"Dat ledsde Wort"	Hilde Balk, Fredy Balk, Ewald Dieckhoff
	"Besöök bi Fro Knickelig"	Marianne Weigelt, Marianne Ellßel, Jutta Ellßel
09.12.1978 Weihnachtsfeier der AWO Rickmerswerft	"Theoterbesöök"	Hertha Völkel, Annette Faße
	"Otto kriggt wat to Wiehnachten"	Hilde Balk, Ewald Dieckhoff
	"Besöök bi Fro Knickelig"	Marianne Weigelt, Marianne Ellßel, Jutta Ellßel

Theoterlüüd

De Theoterlüüd hebbt in disse 25 Johr 61 Stücke instodeert, wobie dat meiste Sketche wöörn. Speelt hebbt se an 169 Doog. All dat, wat wi ob de Dörper speelt hebbt, is dor nich bi. Wi wöörn in Wremen, Misselwarden, Padingbüttel, Dorum, Krempel, Neewohl, Bremerhoben, Debs un uk in Langen. De Andrieber von de Theoterlüüd is vondog Ute Renken-Sill un de 2. Andrieber is Dieter Beier, de meistentieds in de ledsden Johrn uk Regie mokt hett. För 2003 öft de Theoterlüüd den Schwank in dree Töörns "Wer hett, de hett" in.

Deichlerchen

In Oktober 1978 wöör de erste Optritt von de Deichlerchen. De Andrieber von de Deichlerchen weer domols Hilde Balk.

De Deichlerchen is use Seniorenchor. De hüütige 1. Baas Günter Diekhoff kann sick noch good doran besinnen, wie dat anfungen is. In Kinnerspeelkreis hebbt se öft, seeten hebbt se op de lüüten Stöhl von de Kinner. Ober dat hett jem nix utmokt. Hauptsook wöör, se kunnen singen.

Bi veele Theoterobende sünd de Deichlerchen mit optreten un ok bi Feste in de Dörper umto sind se mit ehr Leeder good ankomen. Enen Dag hebbt se noch good in Kopp beholen. Dat wöör an 16. Juni 1981. An düssen Dag weern de Fernsehobnohmen von de Sänger för dat Bremer Fernsehen. Un dat keem so:

Annegret Klaszus ha dat mit de Fernsehlüüd afmokt. Un bums stunn de Kerls an de Döör. De ganze Filmere hett von nomiddag Klock dree bit obends Klock teihn duert. De Deichlerchen mööt sick in Ossentorm opstellen un singen. Von den Vorsänger Günter Diekhoff weern se düchtig andoon. De muss jümmer weller ran. In't Fernsehen (Buten un Binnen) kunn man use Lüüd an 24. Juli 1981 hören un sehen. Junge di, keen ha dat dach, dat Lüüd ut Imsum in't Bremer Fernsehen to sehn sünd. Wi hebbt uns dorto freut un sünd ok son lüttjet beten stolt op use Lüüd un op unsen Vereen. De hütige 1. Baas fallt dorto noch in, dat jümmers, wenn wi op den Butendiek stunnen un jüst anfungen wullen, to singen, een Regenschuer keem, so dat wi jedetmol in den Kiosk von Schwammel flüchten mussen. Dor geef dat Bommy mit Plüm. Obends wörn wi denn bi Themann un hebbt mit de Fernsehlüüd een Schwien obfreten.

Hüüt övt de Deichlerchen alle 14 Doog und Elfriede Themann mit de Quetschkommode un Wolfgang Weigelt mit de Düwelsgeig sünd jümmer noch dorbi. De Andrieber is hüüt Annegret Klaszus un de 2. Andrieber Hilde Balk.

Botterblömchen

De Botterblömchen is een Gesangsgrupp von 14 Froonslüüd.

Gründ worn is disse Grupp von Gisela Saß un Hartwig Skladny. Domols heeten de Botterblömchen noch "Prielwürmer". Von Anfang an dorbi sünd Svenja von Glahn, Silvia Stöbe un Birgit Bartosch. Siet 1985 mokt de Froonslüüd dat in Egenregie. De musikolische Leitung hebbt Birgit Bartosch un Susann Schlather. För dat Organisatorische wöör fröher Inge Meyer tostännig. Nu mookt dat Yvon Warnas.

De Chor schrifft siene egen plattdütsche Leeder, wobie Silke Rabenschlag meist den Text schrifft. De Melodien lett sick Birgit Bartosch infallen. Dat Tohopstellen von de Leeder mokt se alltohop.

De Chor kann op veele Optritte torüchkieken, z. B. mit dat Blancke Trio in de Stadthalle von Bremerhoben, in de Kugelbake-Halle in Cuxhoben un in veele Gemeenen im Umkreis von Cuxhoben, Bremerhoben un Bremen, ob Geburstdage un Jubiläen.

Een grodet Eriegnis wöör 1998 mit de Obnohmen von de 1. CD mit egene Leeder un 2002 keem denn uk de 1. Fernsehoptritt bien NDR in de Sendung "Bi us to Hus."

De Botterblömchen öft jeden Mondag. De Andrieber is Birgit Bartosch.

Kinnerchor

Wat us besünners freut is, dat Brigit Bartosch in April 2002 een Kinnerchor gründt hett. Unnerstützt warde se von Elsa Valente.

Mennichmol sünd dat all 16 Kinner in Oller von 4 - 12 Johren.

Birgit schnackt den von ehr "Rasselbande". De Kinner lernt neben plattdütsche Leeder de plattdütsche Sprook, Noten un Instrumente to speelen. De 1. Baas meent, dat is eene gode Sook.

Jan un Mine

Dat sünd twee Froonslüüd, de dree Sproken snackt: hochdütsch, plattdütsch un över anner Lüüd.

De beiden (Jan = Sonja Ellerbrake, Mine = Mariannge Weigelt) sludert all 15 Johr öber annere Lüüd. Den ersten Optritt harn se an 04. April 1988. Un dat keem so:

Marianne Weigelt hett Sonja Ellerbrake frogt, ob se nich Lust hett, mit ehr op ne Silberhochtied un uk op den 60. Geburtsdag von ehren Mann Wolfgang Weigelt wat vortodregen. Sonja Ellerbrake meen den sponton: "Weest wat, ick speel een Mann". Un dat hett se nu dorvon. De beiden hebbt all middewiel 334 Opföhrungen vörtowiesen. Dat sünd meist Geburtsdagsfiern, Hochtieden, Bremerhobener Buernmarkt, Wiehnachtsfiern usw.. Un denn ward de Jubilare düchtig dör den Kakao trocken. De grode Dörbuch von Jan un Mine weer 1991 op de 900-Johr-Fier in Imsum. Sied de Tied sünd de beiden uk op de Seniorenwiehnachtsfier in de Imsumer Mehrzweckhalle nich wegtodenken. Dor bringt se denn meist neben Jan un Mine uk noch Sketche ("Eten for Een" (Dinner for one), Schiller un Schaller, Kuddel Marmelbüddel un Tante Anni, neu: De Klookschieter). Beide speelt uk Theoter mit. Sonja Ellerbrake hört uk to de Deichlerchen un is siet 1991 Schriebersche von ""De Lüüd von Ossentorm".

Lesegruppe

Dormit wi ok de Kinner an de plattdütsche Spraak rankregen, hebbt wi in de Anfangstied von usen Vereen uk noch ne Lesegruppe hart.

De Andrieber dorvon wöörn Annette Faße, Edith Kluge un Else Schwarz.

Uk geef dat mol ne Volkstanzgruppe. Andrieber dorvon wöör Renate Görtz.

Statistik

In de 25 Johr hebbt wie 5 Vörsittende hat:

Marianne Ellßel, Fritz Thode, Edith Kluge, Dieter Beier, siet 1994 is de 1. Baas Günter Diekhoff.

De Rendant Heinz Knippenberg mokt dat all 23 Johr, jüst so wie de Geldindrieber Anneliese Deppe.

Speelt hebbt wi de ersteTied in Weddewarden, mol in de School, in de Füerwehr oder in dat Gemeendehuus bi de Kark. Wi weern domols een "Wanderbühne", as man dat op hochdüsch seggt.

Seit 1984 speelt wi hier in use Mehrzweckhuus. De Bühne hebbt wi sülms boot. Plont un utföhrt hett den Bühnenboo domols Heinz Ellerbrake. Dat wöör een Jahrhunnertwark!

1997 hett de Stadt Langen den Kinnergorden boot un bi disse Gelegenheit hebbt wi den Sool gröder mokt un de nee Bühne in Egenregie umboot.

Mien Dank dorför an de Stadt Langen un ok an Jürgen Kopelke. He wöör domols Kämmerer un muss sehn, wo he dat Geld herkreeg.

Denn snackt de 1. Baas noch een Dankeschön an de Helpslüüd ut.

"Wat wöörn wi ohne de veelen Helpslüüd. Dormit meen ick de Lüüd, de de Bühne obboot, de Brote smeert, de achter de Theke stoht, de de Korten verkofft, de Plakate verdeelt un de dorvor sorgt, dat wi glieks (meent is dormit de Kommersnomiddag an 26.01.2003) Koffi un Koken kriggt. Veelen Dank an alle.

Leeve Lüüd.
Dat wöör so een beten wat öber ""De Lüüd von Ossentorm".
Ick kunn noch stundenlang vertelln. Ober ick glööv, dat langt nu.

Ick as Börgermeister kann mi Imsum ohne ""De Lüüd von Ossentorm" nich mehr vörstellen.

Veelen Dank nochmols an alle Lüüd!